Malem lilikuran, MALEMAN ITUNGAN GANJIL di Bulan Puasa

Ayeuna geus nincak malem ka tujuh welas.
Jadi inget mangsa keur budak baheula. Aya sepuh nu sasauran :
"Tah, barudak, sakeudeung deui malem lilikuran. Loba Abdul Malem geura", saurna.
Harita mah ngahuleng, teu ngarti !
Naon maksad anjeunna, nyebat 'Abdul Malem'.
Kakara kaharti basa nepi kana malem salikur. Satutasna tarawéh, di masigit téh loba nu ngirim dahareun. Aya dupi, aya kupat keupeul, aya ranginang, opak, jeung sajabana ti éta. Euyeub nu puguh mah.
Jeung, ditempo-tempo, nu tarawéh téh ngalobaan. Da, kamari-kamarina mah tara nempo si akang éta, si emang éta, si bapa itu.
Heuheuy..... deuh, kakara apal. Geuning hartina "Abdul Malem" téh sing saha waé jalma anu ngahaja tarawéh ka masigit lamun mangsana geus malem lilikuran, bari di masigitna loba nu ngirim dahareun.

sumber Facebookna Oerang Soenda