KUNANG-KUNANG KASMARAN
kawantu peteng peuting
poek mongkleng
Bulan mah satia maturan
sanajan kari sapotong
Bentang ngabageakeun
cingkaretit pating karetip
silih kiceupan jeung kunang-kunang
burinyayna emas sinangling
kunang-kunang ngan bati tanggah
ngaraga wayahna bongan pajauh
Bari ngepakeun jangjang ipis satekah polah
Hayang ngapung ka awang-awang
ninggalkeun buana panca tengah
hayang ngajul bentang baranang
Takdir teu benang dipungkir
kadar teu benang disinglar
Kunang-kunang bati rumahuh
ukur bisa nyawang kanu jauh
kuring lain manuk heulang
kitu ceuk kunang-kunang
Dipepende simpe
luhureun kembang tarate
diusapan hiliwir angin
ngubaran nu keur kasmaran
Sing angin
pangnepikeun salam kuring
duh mega
pangmawakeun ieu cinta
Sanajan pajauh raga
cinta mah bakal tetep aya
ngancik na hate kuring
sumarambah dina dada
Teu lila antarana
angin balik ka buana
ngaharewos mawa beja
cenah asih katampi
cinta ditarima
”kunang-kunang anu heman,
bentang atoh kacida,
nguping wartos nu ngaharewos
yen anjeun karep miharep”
Ti harita bentang jeung kunang-kunang
pasini jangji rek ngahiji
najan ragana paanggang
cintana ngawujud manjang
Disaksi ku bulan diawang-awang
jeung tarate di situ herang
Kunang-kunang kedal ucap
ka sakuliah alam mere beja
”kuring teh bentang dibuana”
Bentang ge teu eleh geleng
ka maya pada mere bewara
” kuring teh kunang-kunang dilangit lenglang”
salam kanggo akang....
ReplyDeletealaika, wa'alaikum salam pangersa....
ReplyDelete